Пред две недели во дворот на градинката „13 Ноември“ во Буњаковец, деца пронашле шприц, а родителите стравуваат дека некои од нив можеби се гребнале или боцнале од иглата, објави „А1он“.

Додека играле, децата го зеле шприцот и си го предавале едно на друго, без да забележи никој возрасен колку долго траела оваа ситуација.

Родител за „А1он“ изјавил дека станувало збор за веќе употребен шприц, најверојатно фрлен од зависник од дрога. Паника настанала кога било откриено дека едно од децата го однело шприцот дома скриен во џеб, а подоцна било утврдено и дека имало игла која децата ја скршиле и се гребеле со неа. Сè уште не е јасно дали навистина некои од нив биле боцнати или повредени.

Според сведоштво на родител, пишува „А1он“, од градинката им било кажано да не го шират случајот во јавност и дека ќе се реши внатрешно. Дел од родителите реагирале дека не се обрнува доволно внимание на децата кога играат во дворот, а други барале во вечерните часови да има контроли за тоа кој влегува и што се случува таму.

Од „А1он“ се обиделе да стапат во контакт со директорката на градинката, Ружица Биџовска, но телефонскиот број за контакт не бил во функција, па засега нема одговор од нејзина страна.