Вршителот на должноста министер за одбрана на Данска, Троелс Лунд Поулсен, денеска изјави дека Копенхаген може да ѝ донира борбени авиони „Ф-16“ на Украина, но само доколку тоа го одобри Вашингтон.

„На Украина ѝ се потребни авиони, повеќе од кога било досега, ако сака да ја добие битката. Ова важи и за данските борбени авиони Ф-16“, рече Поулсен.

Данска има 43 авиони „Ф-16“, од кои 30 се активни. Земјата активно ја заменува флотата со помодерни ловци „Ф-35“, исто така од американско производство.

Од почетокот на руската инвазија врз Украина, властите во Киев постојано, но со различен успех, се обидуваат да ги убедат западните сојузници да им помогнат со испраќање на што е можно помодерно оружје и опрена.