Дали ве печат очите, кивате или имате потреба да се закашлате?

Проблеми со дишните патишта, кивање и кашлање во текот на празниците би можеле да бидат последица на сезонскиот грип, но и на посебна алергиска состојба која може да ги зафати оние кои накитиле вистинска елка во својот дом.

Не случајно зборуваме за синдром на новогодишна елка, на ангиски познат како Christmas Tree Syndrome. Но, што точно е тоа и кои се предизвикувачите на овој „божиќен“ синдром?

Синдромот на новогодишна елка се јавува поради мувлата која е присутна на елката што сте ја внеле во домот.

Меѓу најчестите симптоми се печење на очите, кивање, потенцијално сериозни напади на астма, кашлање, а проблемот е многу почест отколку што мислите.

Доволно е да се каже дека веќе во 2011 година, во една студија објавена во списанието „Анали на алергија, астма и имунологија“ (Annals of Allergy, Asthma and Immunology), истражувачите идентификуваа над 50 видови мувла на примероците од нивните новогодишни елки.

Во истата студија, а известувајќи за претходните истражувања, научниците покажале дека спорите на мувла во станот се зголемиле од 800 на 5.000 на метар кубен 14 дена откако елката била внесена во домот.

Симптомите може да се појават кога се подготвувате за украсување, но и по подолг контакт со елката. Некои може да се појават дури и по неколку недели.

Симптоми и причинители

Некои луѓе може да доживеат и кожна реакција, како што се чешање, осип или грутки на местата на допир со дрвото, пишува британски „Сан“.

Главните причини за овој синдром се алергени и надразнувачи поврзани со природни новогодишни елки, вклучувајќи:

Мувла: Се смета за главна причина за респираторни симптоми, бидејќи расте на кората и гранките на дрвото, особено ако се чувало во влажни услови. Студиите идентификуваа повеќе од 50 видови мувла на новогодишни елки.

Полен: Иако боровиот полен може да придонесе за појава на симптоми, експертите ретко го наведуваат како главен предизвикувач.

Испарливи органски соединенија (VOCs): Дрвата испуштаат соединенија како што е пинен, кои имаат пријатен мирис, но можат да го иритираат респираторниот тракт кај чувствителните лица.

Прашина: Прашината, која може да се акумулира на природни и вештачки дрвја и украси, може да предизвика алергиски реакции ако предметите не се правилно складирани или исчистени пред употреба.

Смола и игли од дрво: смолата, позната како колофон, може да предизвика осип сличен на реакцијата на отровниот бршлен, додека иглите од дрво може да предизвикаат иритација на кожата, особено кај почувствителните поединци.

Симптомите на овој синдром често се резултат на комбинација од овие фактори, па затоа е важно да се преземат мерки на претпазливост при поставување на празничните украси.

Што да направите ако сте „алергични“ или имате проблеми со елките?

Експертите препорачуваат:

– измијте ја внимателно елката пред да ја внесете во домот. Ова е добро правило за сузбивање на потенцијалните алергени

– носете градинарски ракавици кога го допирате дрвото, неговите гранки или стеблото. Некои луѓе може да бидат алергични и да добијат осип

– користете прочистувач на воздух доколку имате дома

– преместете го дрвото надвор ако симптомите се влошат

Изборот на вештачка елка се покажува како подолгорочно посоодветно решение за животната средина и здравјето, доколку внимавате на некои работи.

Добро избришете ја прашината пред да ја ставите на местото што сте го избрале во домот.

Исто така, внимавајте и каде ќе ја чувате елката по празниците: на особено влажно место како подрумот лесно може да се формира мувла.