Судскиот совет да ја разреши судијката Даниела Алексовска Стојановска која го пратила Васил Јованов во казнено поправен дом наместо во затвор, побара ВМРО-ДПМНЕ на прес-конференција. Од партијата сметаат дека е апсурдно полнолетно лице да биде осудено за трговија со дрога, а да заврши во поправен дом за малолетници.

-Јавното обвинителство да отвори истрага за судијката. Возачот – убиец кој ја усмрти младата Фросина Кулакова дента наместо во возило требало да биде во затвор и тоа ќе се случело ако судијката Даниела Алексовска Стојановска наместо во поправен дом го испратела во затвор, како што законски и би требало да постапи, рече Миле Лефков од ВМРО-ДПМНЕ.

Тој додаде дека Јованов бил фатен во дело со трговија со дрога и по ниеден основ не би можел да заврши во поправен дом.

-Судскиот совет да не чека туку веднаш да ја разреши судијката а Обвинителството да отвори постапка зошто досудила како што досудила. Јавното обвинителство и судството немаат повеќе слободно време, зашто народот очекува да се зафатат со работа и да го спроведуваат законот. Одговорност мора да има, рече Лефков.