Регенеративната медицина е нова интердисциплинарна гранка на медицината која динамично напредува. Фокусирана е на поправање, замена и регенерација на оштетените клетки, ткива и органи, со цел да се коригира нивната нарушена функција, која настанала како последица на наследни аномалии, заболувања, траума и стареење. Регенеративната медицина користи комбинација на неколку технологии што ја надминуваат трансплантацијата. Методите на регенеративната медицина вклучуваат користење генска терапија, инженеринг на ткивата, репрограмирање на клетките и примена на матични клетки.

Примената на матичните клетки во последно време привлекува големо внимание како нов третман што се фокусира на реактивација и регенерација на коренот на влакното. Повеќе околу тоа ќе ни објасни д-р Елена Арсова, трихолог.

„Третманот со матични клетки е мојот нов омилен третман затоа што сметам дека регенеративната медицина е иднината на третманите на коса. Регенеративната медицина во основа ни овозможува да ги поправиме или да ги обновиме оштетените клетки или ткива“, вели д-р Арсова.

Во фоликулот на влакното постои јадро на матични клетки што го обновуваат влакното со секој циклус на раст. Кога едно влакно ќе испадне, матичните клетки формираат ново идентично влакно. Кај наследното губење на косата, дел од матичните клетки пропаѓа, а останатиот кој останува, не може самостојно да ја изврши својата функција затоа што не добива соодветна сигнализација. Овој податок ни укажува дека наследното губење на косата е реверзибилен процес и може комплетно да се поправи иако порано верувавме дека е траен. Ако на тие оштетени матични клетки им обезбедиме позитивни сигнали, можеме да ја поправиме нивната функција и овозможиме раст на нова коса.

Тоа е возможно со примена на матични клетки од здравите фоликули на влакното, кои се наоѓаат во задниот дел на главата и не се афектирани со опаѓањето. Третманот се состои во вадење на здрави влакнени фоликули од задниот дел на главата со помош на фини инструменти. По вадењето, фоликулите се обработуваат со специјална техника што овозможува одвојување на матичните клетки. Во следата фаза, матичните клетки се подготвуваат и центрифугираат за да се добие раствор. Растворот од здрави матични клетки со техника на мезотерапија се инјектира во зоните на проретчување на косата, појаснува д-р Арсова.

Здравите матични клетки ги стимулираат оштетените и нефункционални клетки на ослабениот корен што резултира со формирање ново влакно.

Овој третман применет по популарниот третман со мезонити, овозможува комплетно враќање на изгубената коса кај навремен третман на губење на косата.