Д-р Даниловски: 90 отсто од луѓето веќе се имуни на ковид, мерките се само на хартија
Епидемиологот Драган Даниловски во вечерашното гостување на ТВ Сител рече дека антиепидемиските мерки во земјава, особено во последно време, „се само на хартија“
Препорачано
– Кај нас всушност мерките цело време се само на хартија, особено во последно време. Инаку, наодот од 75% имуни граѓани важи само за примерокот кој е тестиран. Јас сум споменувал неколкукратно порано дека е стручно неприфатливо и недозволиво врз основа на така нестручно избран примерок она што ќе се добие како резултат да се применува за целата популација затоа што едноставно ситуацијата на терен покажува нешто друго. Епидемиолошката ситуација, поволна каква што е, е можна само ако се имуни преку 90% од населението од сите возрасти. Тоа 75% важеше, можеше да даде ваква епидемиолошка слика само на времето кога имавме работа со оригиналниот сој на вирусот, рече Даниловски, коментирајќи ги резултатите од скринингот за ковид кој го спроведоа здравствените власти.
Според д-р Даниловски, 90% од населението веќе има имунитет.
– Дефинитивно, пресметките покажуваат дека при сегашната вредност на ефективниот репродукциски број, некаде од 0,90 – 0,91 не е можно да биде вкупната пропорција на имуни граѓани од сите возрасти не е можно да биде под 90% – чиста математика, додава Даниловски.
Тој вели и дека треба да се укине обврската за носење маски во училиштата.
– При сегашното ниво на епидемиолошките ризици, дефинитивно да, треба да паднат маските и за децата. Едноставно неприфатливо е децата да ни служат, да ја покриваат недисциплината или лабавоста на возрасните, рече д-р Даниловски.
