Мал цртеж нацртан на пожолтено парче хартија од ренесансниот гениј Микеланџело е продаден за 201.600 долари на аукција во Њујорк, пишува „Франс24“.

Цртежот придружен со писмо од последниот директен потомок на Микеланџело, најпрвин беше проценет помеѓу 6.000 и 8.000 долари.

Но, њујоршката аукциска куќа „Кристи“ соопшти дека малиот цртеж е продаден за „33,6 пати повеќе од најниската проценка“, без да открие никакви детали за купувачот.

Малиот цртеж вусшнот претставува мермерен блок во кој е испишан зборот „simile“, во превод „слично“. Се верува дека е нацртан додека Микеланџело работел на познатиот таван на Систинската капела.

Цртежот е придружен со писмо напишано од Козимо Буонароти во 1836 година, во кое тој му ја нуди работата на својот „славен предок Микеланџело“ на Сер Џон Бовринг, подоцна гувернер на Хонг Конг, чиј потпис се наоѓа на дното на хартијата.

Експертите од аукциската куќа го пронајдоа писмото и дијаграмот прикачени на задната страна на друга слика која со децении се наоѓала во приватна колекција.

Иако не е потпишан од Микеланџело, „Кристи“ соопшти дека истражувањата потврдиле дека малиот цртеж е дело на големиот италијански уметник.

Се смета дека помалку од 10 дела на Микеланџело се во приватна сопственост, а повеќето се во музејот Каса Буонароти во Фиренца.