За планираните терористички напади на концертот на Тејлор Свифт зборуваше заменик директорот на ЦИА, Дејвид С. Коен.

„Австријците беа во можност да ги уапсат осомничените бидејќи агенцијата и нашите партнери во разузнавачката заедница им дадоа информации за тоа што планира да направи оваа група поврзана со ИСИС“, изјави заменик-директорот на ЦИА, Дејвид С. Коен, пишува „Холивуд репортер“.

Десетици илјади обожаватели беа цел на спречен терористички напад на концерт на Тејлор Свифт во Виена, изјави за новинарите официјален претставник на ЦИА.

„Тие планираа да убијат огромен број, десетици илјади луѓе на овој концерт. Австријците беа во можност да ги уапсат осомничените бидејќи агенцијата и нашите партнери во разузнавачката заедница им дадоа информации за тоа што планира да направи оваа група поврзана со ИСИС”, рече тој.

Концертниот промотор „Баракуда мјузик“ ги откажа концертите на познатата пејачка закажани за 8, 9 и 10 август и нагласи дека немаат друг избор освен да ги откажат настапите бидејќи безбедноста на сите посетители е приоритет.

Уапсени се три лица, меѓу кои и 19-годишен Австриец кој се смета за главен осомничен. Останатите осомничени се 17-годишен Австриец и 18-годишен Ирачанец.

На прес-конференција на 8 август, Омар Хајави-Пирчнер, шефот на австриската Дирекција за државна безбедност и разузнавање, рече дека 19-годишниот австриски осомничен признал дека имал намера да „изведе напад“ на концертот на Свифт „користејќи експлозиви и ножеви“, објавија светските медиуми.