Ракетата „Вулкан“(Vulcan) наскоро ќе носи примероци од косата на тројца американски претседатели во вселената, како и пепелта на легендите од научно-фантастичната серија „Ѕвездени патеки“.

Мисијата ќе ја организира „Целестис“, компанија специјализирана за испраќање кремирани останки и примероци од ДНК во вселената, пренесува „Хјустонкроникл“.

Станува збор за примероците од косата на првиот американски претседател и водачот на бунтот против британските власти во Северна Америка, Џорџ Вашингтон, како и на генералот и американски претседател Двајт Ајзенхауер и неговиот наследник на чело на Белата куќа, Џон. Ф. Кенеди.

– Апсолутно е изводливо, од научна гледна точка, идните истражувачи да можат да ја пронајдат оваа летечка капсула и да проучат што има внатре. Веруваме дека им оддаваме признание на тројцата претседатели – изјави претседателот на компанијата Колби Јангблад.

Покрај примероците од косата на поранешните претседатели на САД, летот ќе ја содржи и пепелта на креаторот на серијата „Ѕвездени патеки“, Џин Роденбери , неговата сопруга Мајел Барет Роденбери, која играше значајни улоги во таа серија, како и примерок од ДНК на нивниот син. Во вселената ќе летаат и посмртните останки на другите легенди на „Ѕвездени патеки“ – актерката Нишел Николс, која го играше поручникот Ухуру, и актерите Џејмс Дуан, познат по улогата на Монтгомери Скот и Дефорест Кели, кој го играше доктор Леонард Мекој.

– Многу сме задоволни што со оваа мисија го исполнивме ветувањето што ѝ го дадов на Мајел Барет Роденбери во 1997 година, дека еден ден заедно со неа и нејзиниот сопруг, креаторот на „Ѕвездените патеки“ Џин Роденбери, ќе летаме на спомен-лет во вселената – изјавил извршниот директор на компанијата Чарлс Чафер.

Во вселената ќе летаат и посмртните останки на астронаутот од Аполо, Филип Чепман, кој не можел да лета од Земјата во 1960-тите.

Лансирањето на ракетата „Вулкан“ било планирано за 24 декември, но било одложено за почетокот на следната година, т.е. за 8 јануари 2024 година.