Кевин Мекбрајд е познат како последниот борец кој го победи Мајк Тајсон, но сега е далеку од боксот. 47-годишниот Ирец се оддалечи од боречките спортови, бидејќи кариерата не му се движеше во посакуваниот правец.

Сега работи како шумар, дрвосечач, а неговиот поранешен ривал Тајсон во 53 година од животот се подготвува за нов дуел со Ивандер Холифилд.

„Железниот Мајк“ редовно објавува снимки во кои делува моќно, можеби и подобро од пред 15 години кога имаше порази и од „второкласни“ боксери.

Токму во последниот меч од кариерата, во шестата рунда беше совладан од Мекбрајд во 2005 година.

После таа борба, Тајсон призна дека од својот тим му рекоа да го запре мечот, бидејќи веќе долг период згаснува желбата да биде дел од спортот.

– Работам како шумар, сечам дрва, го чистам снегот и добро ми е. Прилично сум зафатен, а ми се допаѓа тоа што го победив Тајсон. Но, не седам цел ден да го гледам тој меч од соништата. Некој неодамна го објави на Фејсбук, па го погледнав. Исполнување на соништата, нели? – беа зборовите на Мекбрајд за „Дејли мејл“.

Мекбрајд учествуваше на Олимписките игри во 1992 година, има учинок од 35-10, а после победата над Тајсон, славеше и против Бајрон Поли, но потоа претрпе дури шест порази во наредните седум борби. Во 2011 година одлучи да ја заврши кариерата.