Меритон Чивули, шефот на кабинет на министерот за здравство Беким Сали е уште еден раководител во здравството кој бил разрешен од функцијата, потврдил за „Фокус“ министерот, без официјално да ги каже причините за разрешувањето.

Чивули бил разрешен во понеделникот. „Фокус“ пред неколку месеци објави дека сега веќе поранешниот шеф на кабинет на дел од директорите на болниците им праќал списоци со имиња и презимиња на вработени Албанци, кои требало да се стават на раководни позиции во дел од болниците, бидејќи според него, имало премалку раководители- Албанци во Клиничкиот центар.

„Многу низок е опфатот на Албанци на раководни позиции во болницата“, гласела една од пораките.

Дел од директорите велат дека се соочиле со притисоци откако го пролонгирале унапредувањето на наложените кадри.

Разрешувањето на Чивули е дел од бранот смени на раководители во здравството, кој продолжи денеска со оставките поднесени од директорите на Детската клиника, д-р Аспазија Софијанова и на Клиниката за онкологија, д-р Нино Васев. Иако двајцата поднесоа оставки откако тоа од нив го побара министерот Сали, Васев тврди дека се повлекува од лични причини.

Министерството попладнево соопшти дека е разрешен и организацискиот директор на Детската клиника, Аљајдин Мемеди.

Д-р Софијанова и д-р Васев поднесоа оставки од директорските позиции на Клиниките