Дискографската куќа „ПМГ Џез“ од 18 до 20 мај во камерната сала на Филхармонија и во Младинскиот културен центар го реализира четвртото издание на музичкиот фестивал „Крај Вардарот џез“.

– Ми се чини дека фестивалот полека почнува да добива облик, па и да стои на сопствени нозе. Четврто издание, најквалитетна и најразновидна понуда досега, атрактивни гости, цврста автентична домашна програма, како директен одраз на работата на нашата дискографска куќа. Фестивалот активно соработува со европската програма „МОСТ“, локалните културни оператори „Аудиокултура“, а се јавуваат и други потенцијални соработници. Полека, но сигурно, обликуваме нешто препознатливо, нашата визија е сѐ појасна и за нас и за публиката. Одиме напред – истакна Мирко Попов, коорганизатор на фестивалот.

Фестивалот беше отворен на 18 мај на малата сцена во Филхармонија со настап на Дамир Имери Трио. Во триото членуваат Дамир Имери, Ади Имери и Ратко Даутовски. Истата вечер настапија и „Перфорто“ од Полска, со Ола Р’жепка на пијано и Лукаш Марчинијак на електрична гитара.

Во програмата на фестивалот има и промоција на најновото винил издание на „ПМГ Џез“, компилацијата „Крај Вардарот џез, Vol.2“, во рамките на „Крај Вардарот Сесии со Аудиокултура“, како и концерти на дуетите Филип Букршлиев / Благојче Томевски и Глигор Кондовски / Владан Дробицки.

На последната вечер, на 20 мај, во Денсинг салата на МКЦ ќе настапат „Ларта“, проектен состав на тапанарот Дино Милосављевиќ, и ѕвездите на фестивалот „Чуи“ од Хрватска, загрепски квартет чија визија е спој на џез со современа клупска танцова музика, електроника и рокенрол.

Фестивалот е дел од програмата за размена на фестивали („FEX – Festival Exchange“) на европскиот проект „МОСТ“, а поддржан е и од Министерството за култура на РСМ. Дизајн за визуелните решенија на фестивалот направи Виолета Качакова.

(Текстот е објавен во „Културен печат“ број 179, во печатеното издание на весникот „Слободен печат“ на 20-21.5.2023)