Политичките партии и функционерите им го честитаат 1 Мај, денот на трудот на работниците со пораки дека денот е симбол на борбата за работничките права.

ВМРО-ДПМНЕ им го честита Меѓународниот ден на трудот на сите граѓани. Овој ден е симбол на борбата за работничките права. ВМРО-ДПМНЕ останува посветено на создавање нови економски политики кои ќе овозможат отворање на нови работни места, подобрување на стандардот и креирање општество во кое секој граѓанин ќе има можност за напредок и просперитет. Нека овој ден биде поттик за сите, за продолжување на заложбите кон градење посилна поправедна и поуспешна Македонија. ВМРО-ДПМНЕ го оддава заслуженото признание на сите работници. Нивната посветеност труд и истрајност се темелот врз кој се гради иднината на Македонија. Честит празник!, велат од ВМРО-ДПМНЕ.

Честитка стигна и од претседателот на СДСМ Венко Филипче.

Денес е 1 Мај — ден кога го славиме трудот и достоинството на секој човек што создава, гради, образува, лекува, се жртвува за своето семејство и за својата земја. Како човек, секогаш сум имал длабока почит кон секој што со својот труд го движи општеството напред. Како претседател на СДСМ, мојата обврска е таа почит да се претвори во реална политика за поддршка на работниците и нивните права. СДСМ отсекогаш стоел на страната на работниците. Додека бевме на власт, се боревме за покачување на платите, за подобри услови за работа, за сигурност и почит кон секој работник. Сега, и во опозиција, продолжуваме со таа борба. Има уште многу работа и борба пред да кажеме дека живееме во фер и праведно општество – општество што целосно го цени трудот на работникот. Но СДСМ нема да престане да се бори за такво општество. Кога сме заедно, кога сме гласни и истрајни, можеме да направиме промени.
Овој ден нека не ни биде само празник. Нека биде потсетник дека секој што работи заслужува достоиснствена плата, време за семејството и глас што се слуша.
Честит 1 Мај!, пишува во честитката од Социјалдемократскиот сојуз.

Први мај, како симбол на борбата за работничките права, за социјална правда и достоинствен живот, е денот кога оддаваме признание на сите оние кои живеат од својот труд, кои чесно ја извршуваат својата работа, придонесувајќи за подобра иднина за себе, за своите семејства и за целото општество, напиша претседателот на Собранието Африм Гаши во честитката по повод Меѓународниот ден на трудот.

Затоа, како што посочува Гаши, на Меѓународниот ден на трудот, упатува честитки до сите работници во нашата држава кои со својата секојдневна посветеност и труд се столб на нашето општество и економија.

– Како државни институции, наша врвна обврска е да создаваме услови за сигурна, правична и достоинствена работа за сите. Вашиот труд заслужува да биде вреднуван соодветно, со почит и со поддршка. Во мое лично име и во име на Собранието на Република Северна Македонија, Ви посакувам добро здравје, достоинствен живот и уште многу професионални успеси. Честит 1 Мај – Ден на трудот, истакнува Гашиу во честитката.

Градоначалникот на Општина Центар, Горан Герасимовски, по повод 1 Мај — Меѓународниот ден на трудот, упати честитка до граѓаните, потенцирајќи ја важноста на трудот како темел на општеството и човечките вложувања во поттик за социјална правда.

„Општеството е онолку силно колку што се почитувани и вреднувани работниците кои го сочинуваат неговото јадро. Наша должност е да продолжиме да се грижиме за социјална правда, солидарност и еднакви можности за сите, заедно градејќи достоинствено утре. Денеска оддаваме почит на трудот и напорот што секојдневно го вложуваат работниците во Општина Центар. Нивната посветеност, одговорност и професионалност се темелот врз кој ја градиме поуслужна, поефикасна и поодговорна локална самоуправа. Благодарност до сите ангажирани што со својот труд придонесуваат Центар да биде подобро место за живеење“, истакна Герасимовски

Тој додаде дека 1 Мај е симбол на борбата за работнички права, за фер услови и достоинствен живот за сите, но и потсетник дека заеднички сме обврзани да го негуваме трудот како двигател на секое општество.

Честитка упатија и од Социјалистичката партија на Македонија.

Почитувани работници, изминативе триесет и пет години работникот и неговиот труд постојано и сè повеќе се потценети и згазени. Периодите на социјалдемократската влада оставија социјална пустош, тие се најтешките и најцрните за македонското работништво, тоа се години исполнети со нови илјадници невработени и со сè поголем број лица кои живеат во сиромаштија. Години кога трудот на македонскиот работник е сè повеќе потценет, животот сè поскап, а работничката несреќа сè поголемa, велат од Социјалистичката партија.

Оттаму констатираат дека „македонските работници со безнадежност, очај и чувство дека се оставени сами го одбележуваат трудбеничкиот празник“.

Сите мерки на сите досегашни антиработнички влади се претворени во вулгарен политичко партиски маркетинг на една малограѓанска експлоататорска самонабедена елита која посега да владее со сè и секого, директно штитејќи ги интересите на капиталот, а на штета на работниците. Сè што беше општествено го претворија во јавно, а потоа истото тесен круг за себе го присвоија и го сметаат за лично. Најголемиот грабеж на работничкото, општественото и народното го изврши таа социјалдемократска клика која беше задолжена да ги штити работниците. Клика која не ги сочува работничките придобивки од претходниот период, туку брутално ги погази, а работништвото безмилосно го предаде. Долг децениски период заеднички и од темел ја градевме нашата држава, како дел од поранешната федерација. Од тогаш Социјалистичката партија на Македонија ги претставувала и постојано ги штитела интересите на работниците и на работничката класа, иницирајќи го и активно учествувајќи во процесот на воведување на самоуправувањето како највисок стадиум на владење на работниците со општествено-економските процеси, имотот и со сопствениот труд. Затоа и врз основа на ова искуство и идеолошките определби, Социјалистичката партија на Македонија има историска одговорност и морална должност да се грижи и да ги штити работничките права и интереси и денес.Другари работници, Време е нештата да се променат.  Време е поразите и неуспесите преку надежта која се раѓа, заедно да ги замениме со силна експлозија на одлучност и решителност, кршејќи го јаремот на економското поробување и социјалното ништење на македонскиот работник со ново и слободно сонце. Време е за враќање на работничкото достоинство, заедно и обединети со чесна работа, трудољубивост и посветеност да донесеме добробит, подобар стандард и да обезбедиме подобро за сите, вистински вреднуван труд, социјална правда и широки права за македонските работници, велат од оваа партија во својата честитка.

Честитка по повод 1 Мај – Меѓународниот ден на трудот, упатија и од Министерството за енергетика, рударство и минерални суровини.

Упатуваме искрена честитка до сите работници во енергетскиот сектор – од рудниците, преку електраните, до мрежите за пренос и дистрибуција на енергија, велат оттаму.

По повод 1 Мај, министерот за јавна администрација Горан Минчев упати честитка до сите работници во државата, со посебна благодарност до административните службеници кои, како што рече, се „двигатели на секојдневното функционирање на државата”.

„Овој ден е не само симбол на работничките права, туку и потсетник дека реформите мора да се водат со интегритет и визија. Денес, повеќе од кога било, граѓаните бараат ефикасна, стручна и департизирана администрација – и ние работиме токму на тоа. Работиме на администрација која ќе биде партнер на бизнисот, поддршка на граѓаните и двигател на европските интеграции. Времето на неефикасност и политички влијанија мора да остане зад нас. Нашата цел е модерна администрација по европски стандарди – достапна, професионална и ориентирана кон резултати” – додаде Минчев.

Министерството за јавна администрација упати порака за континуиран социјален дијалог и заедничка работа со синдикатите, како предуслов за одржливи реформи и вистински напредок.