Мал будистички храм во северниот дел на Тајланд останал без монаси откако се открило дека целиот манастир користел метамфетамин, соопштија локалните власти, пренесува „Вашингтон пост“.

По наредбите да се истражи употребата на дрога во провинцијата Фетчабун, локалниот шериф и селскиот началник во подобласта Бунг Сем Фан, на околу 150 милји северно од Бангкок, вршеа прверки низ училиштата, фабриките и храмовите во потрага по зависници од дрога и дилери за потоа да ги испратат на рехабилитација.

„Како водач на заедницата, бев исплашен бидејќи никогаш не мислев дека монасите ќе бидат зависни од дрога“, рече Сунгјут Намбури, началник на селото. „Никогаш не мислев дека дрогата ќе се користи во храмовите“.

Монасите се почитувани личности во тајландската култура. Тие во метроата имаат резервирани седишта, какви што имаат бремените жени и постарите лица. Особено во руралните области надвор од Бангкок, монасите се доверливи советници, кои често служат како претставници и пример за заедницата.

Затоа, овој случај за Сунгјут бил многу големо изненадување, откако по истрагата се потврдило дека четворица монаси во локалниот храм биле позитивни на употреба на метамфетамин кога тој и шерифот го посетија манастирот.

„Тестовите потврдија дека монасите се корисници на дрога. Некои селани ми предложија да ги тестираме и нив, што на почетокот ми беше чудно“, вели тој.

Утврдено е дека дури и игуменот – поглаварот на манастирот, кој служел како монах 10 години – користел дрога.

„Кога го видов тестот на игуменот, бев запрепастен“, рече Сунгјут.

Откако тестовите за дрога се покажале позитивни, монасите признале дека користеле дрога. Некои од нив признале дека биле долгогодишни зависници.