Македонија освои бронзен медал на Европската олимпијада по информатика за девојки (ЕОИД), која од 14 до 20 јули се одржува во Бон, Германија. Сара Стефановска од Крива Паланка го освои медалот на ова престижно натпреварување, а нејзината колешка Антонела Владева од Свети Николе доби олимписка пофалница.

Македонскиот тим го сочинуваа и Елена Трифуноска од Тетово и Јагода Панова од Струмица. Ова е трет бронзен медал по ред за македонските ученички на оваа олимпијада и вкупно осми од вкупно пет учества – досега освоиле 1 сребрен и 7 бронзени медали.

Тимот беше предводен од д-р Миле Јованов и д-р Емил Станков од ФИНКИ. Учениците се селектираат преку циклусот натпревари што се организираат на платформата mendo.mk.

ЕОИД е европски натпревар посветен на средношколки заинтересирани за компјутерски науки и има за цел да ја поттикне родовата еднаквост и женското учество во оваа област. Оваа година учествуваа 138 натпреварувачки од 38 европски држави, како и 85 девојки од 22 земји надвор од Европа, меѓу кои САД, Канада, Индија и Египет.

Следната ЕОИД ќе се одржи во 2026 година во Италија, а на македонскиот информатички тим му претстои и учество на Интернационалната олимпијада по информатика, што ќе се одржи од 27 јули до 3 август во Сукре, Боливија.