Британската влада повторно одби да го објави извештајот за можното мешање на Русија во изборите во таа земја, со образложение дека на владата на Борис Џонсон ѝ треба уште време за да го разгледа документот.

Извештајот на Одборот за разунавачки и безбедносни прашања е испратен на премиерот на 17 октомври, но за да биде објавен за јавноста, неопходно е владата да го одобри тоа.

„АП“ наведува дека доколку извештајот не биде објавен до утре наутро, кога се распушта парламентот, истиот нема да биде достапен за јавноста пред одржувањето на изборите во декември.

Пратениците од повеќе партии, вклучувајќи ги конзервативците на Џонсон, ја повикаа владата да го објави извештајот за време на дебатата во Долниот дом на парламентот, но Кристофер Пинчер од Министерството за надворешните работи рече дека не е невообичаено подолго да трае прегледувањето на таквите извештаи, пренесува „Танјуг“.

Пратеничката на опозицијата Емили Торнбери ја обвини владата дека не го објавува извештајот бидејќи тоа би предизвикало прашања за врските меѓу Русија и кампањата за излезот на Велика Британија од Европската Унија.