62-годишна жена од Велика Британија загина во несреќа на скијање во Франција, при страотен судир со 35-годишен човек кој исто така е Британец, јавуваат локалните медиуми.

Несреќата се случила во скијачкиот центар Лезарк во регионот Савоја, во југоисточна Франција. Станува збор за многу опасна, „црна“ патека, пишуваат медиумите.

Лекарите од Итната помош и скијачите кои се нашле на патеката не успеале да ја реанимираат и спасат жената, која им подлегнала на повредите на самото место. 35-годишниот маж, за кој исто така се вели дека е британски државјанин, стоел на патеката во моментот на ударот. Тој се здобил со скршеница на ногата и бил пренесен во локална болница. И двајцата носеле шлемови, велат властите.

Истрагата за утврдување на точните околности на инцидентот е во тек, изјави локалниот обвинител Бенои Башеле за АФП.

„Црните“ скијачки патеки се многу тешки и се наменети за многу искусни скијачи и сноубордери.