Бразилскиот Манаус во јуни 2020 година се сметаше за прв град во светот во кој населението стекнало колективен имунитет на коронавирусот, откако кај 44 отсто од неговите жители беа најдени антитела. Кај истата таа наводно „прележана“ популација, во јануари годинава повторно три четвртини беа заразени со новата мутација, позната како „бразилски сој“! Три месеци подоцна, Бразил бележи рекордни 4.211 починати во само еден ден (на 6 април), а бројот на новозаразени стаса и до рекордните речиси 100 илјади за 24 часа.

Ќе речете, Бразил е далеку. Дали? Пред 10 дена, во областа Лацио, во Италија, една петтина од позитивните корона-тестови биле токму со бразилскиот „мутант“. На целиот Апенински Полуостров, на 30 март, вкупниот процент што отпаѓаше на оваа корона-варијанта беше 4 отсто. Податок што веројатно не се разликува многу и во други европски земји. Денес тој сооднос е поголем во корист на „бразилецот“, кој полека го потиснува сеприсутниот „британец“ во Европа.

Италија е земја во која живеат илјадници македонски иселеници. Голем број од нив планираат Велигден и Бајрам да ги прослават дома. Како и многумина од целиот европски континент што си дојдоа меѓу најблиските и за божикните празници, околу Нова година, кога македонската Влада ја симна осумдневната забрана за летови од Велика Британија кон Скопје, а со тоа и двонеделната изолација за патниците што стасуваа оттаму.

Поради сознанието дека новата британска мутација на вирусот е поагресивна од претходната, тогаш, д-р Горан Кунгуловски од Клиниката „Жан Митрев“,  поточно на 6 јануари, почна да ги тестира добредојденците на скопскиот аеродром. Резултатите за присуството на Б.1.1.7 варијантата во земјава тој прв го утврди на 27 јануари, само два дена подоцна откако академиците од МАНУ се изјаснија дека британската мутација ја нема на наша територија. Се покажа дека првиот заболен охриѓанец го носел „британскиот сој“ во себе уште кон крајот на декември. Цел месец беше загубен за превентива поради несоодветно државно следење на мутациите и отсуство на навремен одговор. За божикните празници пристигнаа илјадници гастарбајтери, влегоа без задолжителен корона-тест и без нужен карантин, а на 20 јануари и фајронтот на кафеаните беше поместен од 18 на 21 часот. Последиците од тие погрешни чекори ги гледаме неделава, кога просекот на починати е околу 43 на ден поради тешко сопирливата т.н. „широко распространета трансмисија“.

Од јануари до вторникот, единствена применета мерка на заштита кај нас беше таа од 9 март, кога за патниците од Африка при доаѓањето во земјава се одреди (само)изолација поради опасноста од ширење на „јужноафрикански сој“. За разлика од многу држави што се попретпазливи и повеќе се чуваат од „странците“ што им доаѓаат, во најновиот пакет мерки Владата не предвиде тестирање за влез во земјава и задолжителен двонеделен карантин.

Ќе помине многу време за да се постигне посакуваната бројка од 1,2 милиони вакцинирани Македонци, а во таа трка на имунизацијата со новите мутации на вирусот, секој загубен ден значи десетици нови унесреќени семејства. Невоведувањето тестови за влез во земјава е со цел да се олесни протокот на луѓе, што е економски оправдано и, пред сè, е човечки, но треба да се одбере помалото зло додека бројот на вакцинирани не биде задоволителен. Дотогаш, секое олеснување на ограничувањата на нашата граница е потенцијален ризик за нови бранови и пикови, катастрофални исходи и од идно целосно затворање на земјата што е моментно деветта во светот според бројот на починати лица од ковид-19 на еден милион жители. Опомена што тревожи како сирена на возило на итна помош.