Виенската полиција истражува неименуван брачен пар кој се венчал и се разведувал 12 пати во последните 43 години, пренесува „Одити централ“.

Сопружниците се осомничени дека смислиле финансиска измама – искористувајќи ја правната дупка и собрале сериозни пари. Надлежните сметаат дека постарата двојка „разводот го договориле“ на хартија, за жената да добие отпремнина од 27.000 евра. Сè започнало по смртта на нејзиниот прв сопруг во 1981 година.

Тамошниот закон им дозволува на вдовиците да добиваат пари додека повторно не се венчаат, а сопружниците се сомневаат дека разработиле неверојатен план.

На секои две и пол години жената требало да добива 2,5 пати повеќе од стандардната пензија, па парот навреме се разведувал за да обезбеди бенефиции – и повторно се венчал.

Нивната „тактика“ излезе на виделина дури во мај 2022 година, кога Заводот за пензиско осигурување одби повторно да го плати надоместокот и по 12-тиот развод на жената.

Во документите на истрагата стои дека сопружниците живееле во исто домаќинство, заедно готвеле и го делеле брачниот кревет. Соседите не знаеле ништо за разводите и повторните бракови.

Сега се соочуваат со тешки обвиненија за измама, а обвинителите тврдат дека од отпремнини влегле во џеб речиси 326.000 евра! Австриските власти не го признаа нивниот 12-ти развод, па заедно ќе се соочат со обвинение.