Жосеп Борел, шефот на европската дипломатија, издаде остра изјава во која нагласи дека е „згрозен“ од бројот на жртвите на израелскиот воздушен напад во бегалскиот камп Џабалија во северниот дел на Газа, додавајќи дека „законите на војната и човештвото мора секогаш да важат“.

Во објавата на социјалните мрежи, тој напиша: „Следејќи ја јасната позиција на Советот на ЕУ дека Израел има право да се брани во согласност со меѓународното хуманитарно право и обезбедувајќи заштита на сите цивили, јас сум ужаснат од големиот број на жртви по Израелско бомбардирање на бегалскиот камп Џабалија“.

Во нападот, според извори од индонезиската болница во Газа, загинале повеќе од 50 луѓе, а уште 150 се повредени.

„Генералниот секретар на ОН, Антонио Гутереш потсети дека меѓународното хуманитарно право не може да се применува селективно, вклучувајќи ги принципите на дистинкција, пропорционалност и претпазливост. Правото на самоодбрана секогаш треба да биде избалансирано со обврската да се поштедат цивилите во најголема можна мера“, вели Борел.

„Законите на војната и хуманоста мора секогаш да се применуваат, вклучително и кога станува збор за хуманитарната помош. Со оглед на трагедијата што се случува во Газа, Европската унија од минатата недела повикува на хуманитарни коридори и паузи за хуманитарни потреби. како што ситуацијата станува се пострашна, ова е поитно од кога било. Безбедноста и заштитата на цивилите не е само морална туку и законска обврска“, заклучи шефот на дипломатијата на ЕУ.