Екипите на Манчестер сити, Арсенал, Тотенхем и Саутемптон остварија триумфи на „Боксинг деј“ и ја продолжија традицијата да ги израдуваат навивачите со дожд од голови.

Фудбалерите на Манчестер сити и Лестер им приредија вистински спектакл на навивачите на „Етихад“ стадионот постигнувајќи дури девет гола. По првиот дел „граѓаните“ имаа предност од 4:0, за во вториот дел Лестер за само 10-тина минути да дојде до 4:3, но на крајот трите бода ги освои домашниот тим со убедлив триумф од 6:3.

Убедливиот триумф претставуваше еден вид одмазда за минатогинешниот пораз на Сити на домашен терен од 2:5 токму од Лестер. Де Брујне уште во петтата минута ја отвори гол серијата, а во првиот дел погодија уште и Марез, Гундоган и Стерлинг.

Лестер ја врати резултатската неизвесност од 55. до 65. минута со трите гола на Медисон, Локман и Ихеначо. Сепак, победата на Сити ја заверија Лапорт и Стерлинг, со што „граѓаните“ се лидери на табелата со 47 бода, шест повеќе од Ливерпул кој има и натпревар помалку.

Убедлив триумф оствари и Арсенал кој со убедливи 0:5 го совлада Норич како гостин.
Бакајо Сака постигна два гола, додека по еднаш во листата на стрелци се запишаа Тирни, Роув и Лаказет.

Во малото лондонско дерби, Тотенхем со 3:0 го победи Кристал Палас во натпревар во кој Хари Кејн се израмни со Роби Фаулер на листата на најдобри стрелци на „Боксинг деј“. Резултатот го отвори токму Кејн во 32 минута и ова беше негов деветти гол на „Боксинг деј“. Моура зголеми на 2:0, а во вториот дел, Сон го постави конечниот резултат.
Во резултатски најнеизвесниот натпревар, Саутемптон со 3:2 го победи Вест Хем.