Богатинов: Оваа репрезентација потврди дека има многу квалитет за големи достигнувања!
Македонската фудбалска репрезентација ја направи најголемата сензација во својата фудбалска историја со победата над Германија во Дуизбург со 2:1.
Препорачано
Тоа беше втор триумф во квалификациите за Светското првенство Катар 2022, претходно дома убедливо славевме над Лихтенштајн (5:0), а загубивме минимално во Букурешт на стартот со 3:2, иако бевме многу блиску до реми.
Севкупно избраниците на селекторот Игор Ангеловски не ја разочараа јавноста со своите игри кои ветуваат, а нема сомнение дека на најдобар можен начин ќе се претстават и на Европското првенство за три месеци, но за тоа постепено.
И натаму во главите ни е историскиот триумф над четирикратниот светски шампион, Германија која секако останува и натаму големо име на светската фудбалска мапа, главен фаворит во групата за учество на Мундијалот, но составот на Јоаким Лев во Дуизбург беше сериозно предупреден, дека и други репрезентации имаат што да кажат, на фудбалски план.
Столе Димитриевски беше прва опција за првите три натпревари од мундијалските квалификации, а во списокот на голманската позиција беа уште Дамјан Шишковски, Мартин Богатинов и Ристе Јанков.
Ексклузивно за веб порталот на „Слободен печат“ говореше Богатинов, играчот на кипарскиот клуб Етникос Ахна, ги сподели импресиите после триумфот над Германија во Дуизбург, што е тоа што ги краси овие фудбалски херои на Македонија…
– Добар старт во овие квалификации со една голема историска победа против една велесила каква што е Германија и со освоени шест бодови од три натпревари. Оваа победа уште еднаш потврди дека оваа генерација има многу квалитет за големи достигнувања. Тука не зборувам само за индивидуалниот квалитет на играчите кој што е неспорен, туку и тимскиот квалитет кој што ја краси оваа генерација и оваа репрезентација.
Во фудбалот и во секој колективен спорт многу е тешко да се направи една група од повеќе играчи, а да функционираат како еден. За тоа треба време, нашиот селектор Игор Ангеловски во овие пет години го има составено добро тој мозаик каде што направи спој од искусни играчи, пред сè тука мислам на нашиот најдобар фудбалер во историјата на македонскиот фудбал и капитен на нашата репрезентација, Горан Пандев и младоста на екстра талентирани и квалитетни играчи. Тоа вроди со пласман на нашето прво историско Европско првенство, а сега дојде и победата против Германија.
Во иднина може да очекувате уште многу големи резултати од оваа генерација која што треба да биде запишана во историјата на македонскиот фудбал со златни букви – ни изјави Богатинов.
Пандев: Храбрите ги следи среќата, оваа генерација заслужува многу поголем респект
