Благој Ламњов е велешанец кој својата музичка кариера ја гради во Шведска. Во интервјуто за „Слободен печат“ зборува за новиот албум „Nostalgic Love“, за кој и самиот ќе каже дека создава „зависност“ кај секој слушател.

На албумот „Nostalgic Love“ е евидентно влијанието на македонската народна музика, која е отсвирена со неверојатната елеганција на класичната музика, проследена со звукот на кларинетот.

За ова музичко дело може слободно да се каже дека заслужува да се најде на релаксирачките „чил аут“ плејлисти, бидејќи самите звуци создаваат чувство на мир и го носат слушателот во една безгрижна димензија.

Мали грешки за време на настап е нормално да се случат, а иако ги има и на самиот албум, кларинетистот вели дека само тој може да ги чуе, но и дека не би променил ниту една нота од материјалот.

Сигурно е дека крајниот резултат е уживање во својот производ, но дали има дел од работата што не го сакаш?

Маркетинг делот не го сакам воопшто затоа што, на некој начин, негативно влијае врз моето надоградување како уметник. Вистина е дека јас веќе имам убава кариера и можам целосно да се посветам на маркетинг, но мисијата за напредување и станување светска кларинет-легенда го победува бизнис-човекот во мене.

Дали сега, откако веќе е готов албумот, има нешто што би сакал да го промениш?

На „Nostalgic Love“ не би му променил ниту една нота. Овој албум создава зависност кај слушателите и затоа сметам дека е совршен. Овој албум е секојдневие кај деца, тинејџери, рокери, турбо-фолкери, млади и стари. Го сакам секој момент од албумот, дури и секоја микро-грешка што сум ја направил. А, вистина е дека многу научив креирајќи го „Nostalgic Love“, но сето тоа ќе го искористам во вториот мој албум.

Постои ли музичар со кој би сакал да соработуваш, без разлика дали е од локална или светска сцена?

Пред 14 години имав луда идеја, еден ден да ја споделам сцената со Мајкл Џексон. Не се случи. Сега имам друга луда идеја: да ја споделам сцената со Лејди Гага. Држете среќа!

Која нумера од албумот е твоја лична најомилена?

„Two Happy Squirrels“ (Две среќни верверички) затоа што тоа е традиционална песна од Велес, „Сербез Донка“, но уште подрага ми е затоа што оваа песна ја слушнав за прв пат како дете од мојот татко и мојот постар брат. Секогаш кога ја слушам или свирам ми ги враќа чувството на детство и безгрижност, ми го насликува пред очи Велес…

Во кој момент сфати дека сакаш музиката да биде твоја животна определба?

Бев 6. одделение, 12 години. Благодарение на мојот постар брат и учител, Кирил, бргу напредував и со тоа освојував внимание и комплименти од околината, како и поголема почит од страна на спротивниот пол. Замислете кога едно 12-годишно момченце ќе ги вкуси соништата. Засекогаш сака да живее во нив.

Дали други музички жанрови имаат одредено влијание врз она што го работиш?

Секако да! Класиката и народната македонска музика го имаат најголемото влијание, но слушајќи џез, рок, блуз и претпазливо одбрана поп-музика, мојот стил е таков уникатен каков што е и привлекува внимание од секаков тип на луѓе. „Nostalgic Love“ го насликува овој „коктел” од музички стилови кои јас, така речено, го дизајнирав за секој да може да ужива, особено во моменти на мечта и носталгија.

Кога би го променил кларинетот, кој инструмент би го избрал за да ја продолжиш музичката кариера?

Не знам искрено. Веќе свирам на 11 инструменти. Но, ако би променил професија би бил актер, да би можел да привлечам внимание од речиси сите 8 милијарди луѓе во светот, па така популарност да ја искористам позитивно влијаејќи врз светот и реедуцирајќи ги „неуките“.

Се случуваат ли грешки за време на настап во живо? Како се справуваш со нив?

Грешките се највозбудливите моменти на еден коцерт или претстава. Обично добиваш тајна насмевка од колешка/колега на сцената, па потоа следи и нова грешка. Ете и во мојот албум „Nostalgic Love“ има грешки, но тие само јас можам да ги слушнам. Секоја од нив има име…

Покрај музичкиот ангажман, како успеваш да ги балансираш и приватните обврски?

Најголемата приватна обврска ми е да внимавам што јадам и да се грижам за себе физички и психички. Инаку обожавам да гледам филмови и да слушам предавања на тема психологија.