Жител на Гевгелија е купувачот на еден од становите на поранешниот премиер Никола Груевски кои државата ги заплени во случајот „Плацеви на Водно“, објави „Фокус“.

Агенцијата за управување со одземен имот пред околу два месеца продаде два од петте стана на улицата „Бихаќка“ во Скопје, а тогаш не беа откриени новите сопственици. Но, сега во Катастарот веќе е направена промена во сопственоста на еден од становите, додека вториот и натаму се води на име на државата, пишува порталот.

Според податоците, помалиот од двата продадени стана, кој Груевски наводно го користел како „библиотека и работна соба“ меѓу петте распослани станови на цел кат од зградата на „Бихаќка“, го купил жител на Гевгелија. Новиот сопственик, според податоците во Централниот регистар, е гевгелиски бизнисмен со иницијали Д.С.

Станот има 38 квадратни метри квадратни, а за него гевгеличанецот платил 90.000 евра – над двојно повеќе од почетната цена на наддавањето од 44.000 евра.

И вториот стан, за кој се уште не е познат новиот сопственик, се продаде за висока цена. Тој е со површина од 57 квадрати, а од почетната цена од 63.000 евра, достигна цена дури од 131.186 евра, потсетува „Фокус“.

Груевски, кој во време на власта на Зоран Заев избега во Унгарија за да не оди во затвор за корупција, до ден-денес негира дека тие станови биле негови, тврдејќи дека само изнајмувал два од нив.

„Пламнаа“ становите на Груевски на „Бихаќка“, нема интерес за многу поскапите апартмани на Водно