Еден од најдобрите полски пијанисти, Анджеј Јагоѓински, ќе го отвори годинашниот 44. Скопски џез фестивал на 16 октомври во Националната опера и балет. Тој првпат ќе настапи во Скопје, во состав на трио, изведувајќи дела од Бах и Шопен.

Програмскиот директор Оливер Белопета најави дека првата вечер по Јагоѓински ќе настапи Националниот џез оркестар со Зиги Фајгл и Луис Бониља. Следната вечер ќе настапат Марк Рибо и Кахил Ел Забар, а на 18 октомври скандинавските џезери Арве Хенриксен, Јан Банг, Ејвинд Арсет, Ингар Зак и Горан Кајфеш со својот квартет „Тропикс“. Фестивалот ќе заврши на 19 октомври со настап на легендарниот Вадада Лео Смит, Силви Курвоазје и Џејмс Брендон Луис.

Во кино „Фросина“ ќе бидат прикажани документарците „Ни треба фанк!“ и „САН РА: Направи го невозможното“.

„Фестивалот и годинава останува фокусиран на современиот џез и ексклузивноста, со цел да го задржи својот култен статус,“ рече Белопета, додавајќи дека поддршката доаѓа од Министерството за култура, ЕУ канцеларијата и неколку амбасади, но годинава недостасува американската поддршка.

Постерот за фестивалот го изработи Ѓорѓе Јовановиќ.