Третата сезона на популарната серија „Белиот лотос“ („The White Lotus“) ги остави гледачите во неверување поради неочекуваниот заплет што вклучуваше инцестуозна врска меѓу браќата Локлан и Саксон Ратлиф. Но, тие не се единствените кои се изненадени во врска со контроверзните сцени – дел од актерите кои првично се пријавиле на кастингот одбиле да ги преземат овие улоги поради нивната природа.

Директорката за кастинг, Мередит Тукер, за „Мирор“ откри дека некои актери се повлекле веднаш поради непријатноста што ја почувствувале откако дознале за содржината.

„Мораше однапред да ги предупредиме сите кандидати. Им кажавме: ‘Ќе има сцени со истополово бакнување и други слични моменти. Дали ви е прифатливо тоа?’ Некои од актерите што аплицираа беа едвај 18-годишни, па можам да ги разберам зошто не сакаа да учествуваат“, изјави Тукер.

На крајот, улогите им припаднаа на Сем Ниволи (21) и Патрик Шварценегер (31), но дури и тогаш, продукцискиот тим бил загрижен дали ќе останат во проектот откако ќе го прочитаат сценариото.

„Кога им го испративме сценариото на Сем и Патрик, Мајк Вајт (креаторот на серијата) и јас бевме многу нервозни. Мајк дури ме натера да му испратам порака на Патрик за да провериме како ќе реагира. Бевме загрижени“, откри продуцентот Дејвид Бернард.

Иако многумина беа згрозени од заплетот, Ниволи изјави дека немал проблем со снимањето на овие сцени, иако не очекувал таква содржина.

„Кога го добив договорот, имаше ставкa дека треба да бидам подготвен за сексуално експлицитни сцени. Си помислив: ‘Добро, никогаш досега не сум снимал нешто вакво, но за сè има првпат’. Но ова… дефинитивно не го очекував!“, изјави Ниволи.

Тој додаде дека, иако сцената била предизвикувачка, сметал дека има смисла за приказната и за ликот што го игра.

„Тоа ми беше првпат да бакнам некого пред камера. Сè помина колку што можеше поглатко. Единствената непријатност беше тоа што снимавме на јахта, а јас лесно добивам морска болест“, откри тој.

Шарлот Ле Бон, која во серијата ја игра мистериозната манекенка Клои, изјави дека Патрик Шварценегер не бил воодушевен од сцената, но сакал што побрзо да ја завршат.

„Мислам дека му беше тешко, но размислуваше практично: ‘Ајде да го направиме ова како што треба од прва, за да не мораме да го повторуваме’. Затоа што, ако не испадне добро, мораш да го повториш уште неколку пати. Неговата реакција во епизодата беше вистинската – сите мислевме дека ќе поврати“, раскажа Ле Бон.

Шварценегер подоцна појасни дека не бил тој што почувствувал гадење, туку неговиот лик.

„Кога сум во улога, се трудам да ја доловам вистинската реакција. Во сценариото, мојот лик се чувствува ужасно и повраќа по сцената. Се надевам дека тоа нема да биде извадено од контекст, за да не помисли некој дека јас лично се згрозив од Сем или нешто слично“, објасни Шварценегер.

И покрај бурните реакции на публиката, продукцискиот тим инсистира дека сцените имаат важно место во приказната.

„Ова беше одлука на Мајк Вајт, кој е генијален раскажувач. Сметам дека овие сцени не се додадени само заради шок вредност. Тие се суштински дел од наративот и носат поголема тематска порака. Како што ќе се приближиме до крајот на сезоната, ќе сфатите зошто ова беше важно. Овој семеен заплет ми е особено драг, особено односот меѓу браќата, кој кулминира на многу значаен начин“, заклучи продуцентот Бернард.

„Каков е овој инцест?“: Сцена од третата сезона на „Белиот лотос“ ги шокираше гледачите!