Екипата на Баскет Кам 2011 ќе го брани трофејот од државниот Куп „Благоја Георгиевски – Буштур“ против екипата на Вардар во финалето од овогодишното издание на завршницата од Купот откако двете екипи ги совладаа своите противници во рамки на полуфинални дуели.

ЖКК Вардар ја отвори завршницата од Купот со триумф над Крива Паланка со резултат 78:72. Во победничките редови најефикасна беше Зафировска со 19 поени (пет скокови), следува Алексиќ со 15 поени, седум скокови и четири асистенции.

На спротивната страна прв стрелец беше Мекелхани која имаше „дабл-дабл“ учинок од 33 поени и 20 скокови, додека Робинсон запиша 14 поени, 10 скокови и шест асистенции.

Неколку часа подоцна во второто полуфинале Баскет Кам 2011 славеше над Бадел 1862 со 61:58.

За Баскет Кам 2011 Кметовска реализираше 18 поени и имаше 14 скокови, следена од Поп-Димитриовска со 16 поен ии пет украдени топки.

Финалниот дуел помеѓу Вардар и Баскет Кам 2011 е закажан за утре, сабота (15.02.2025), со почеток од 17.00 часот.