Германската Федерална канцеларија за миграција и бегалци (БАМФ) го објави најновиот извештај за поднесени барања за азил во државата според кој бројот на барања за азил во Германија во 2024 година е значително намален во споредба со претходната година.

Според БАМФ, како што јавува ДПА, вкупно 229.751 лице поднеле почетни барања за азил во Германија, што е за скоро 100.000 барања помалку од извештајот во 2023 година, односно има намалување за 30 отсто.

Најголем број од барањата доаѓаат од државјани на Сирија, Авганистан и Турција.

Покрај ова драстично намалување на бројот на барања за азил, Германија сè уште продолжува да биде омилената дестинација за најголем број бегалци, споредбено со останатите водечки земји-членки во ЕУ како Шпанија, Франција и Италија.

– Успеавме значително да ја намалиме нерегуларната миграција – изјави грманската министерка за внатрешни работи Ненси Фезе.

Таа додаде дека овој остар пад на барањата за азил го смета за успешен, за кој според неа, најзаслужна е донесената одлука за проширените полициски контроли и контроли долж копнените граници на Германија.

„Ние ги попречуваме патиштата за шверц“, истакна Фезер за дадените напори во борбата со криминалот и сите типови на криумчарење.

Германија ги воведе проширените гранични проверки минатата година, и покрај тоа што сите земји-соседи се членки на безвизната Шенген зона на транспорт. Овие мерки првично биле воведени со привремено и нивниот рок завршува во март, но Министерството за внатрешни работи веќе укажа дека проверките ќе продолжат и по тој датум.

Миграцијата и политиката за азил се очекува да бидат меѓу главните теми во фокус на кампањата за претстојните германски парламентарни избори на 23 февруари оваа година.