Согласно со тековните информации на Народната банка во периодот од 29 до 30 ноември не се очекува прекин на клучните работни процеси на банките и на територијата на Скопје, односно сите банки ќе работат, соопштија од НБРСМ.

-Сепак, за работното време на одделните експозитури, имајќи го предвид безбедносниот аспект на Самитот на ОБСЕ, ги упатуваме граѓаните да се информираат преку комуникациските канали на банката чии клиенти се – соопштија од Народна банка.

Инаку, пензиите за ноември 2023 година официјално ќе бидат исплатени на 1 декември 2023 година, а некои од банките ја исплаќаат и ден-два претходно. Така од Халкбанк АД Скопје, ги известија своите клиенти дека исплатата на пензиите на нивните платежни сметки ќе се изврши во вторник (28 ноември) и средствата ќе им бидат на располагање во сите филијали на банката, преку банкоматите и ПОС терминалите кај трговците, преку употребата на електронско и мобилно банкарство. Исплатата може да се изврши и на шалтерите во поштенските единици на АД ,,Пошта на Северна Македонија “ само за клиентите кои имаат дадено согласност за исплата преку пошта.