Најмалку шест луѓе се убиени, а повеќе од 100 други – меѓу кои жени и деца – се киднапирани во напад врз заедницата Каиру во северозападниот дел на нигериската држава Замфара, изјави локален пратеник за Ројтерс.

Замфара е епицентар на напади од страна на вооружени банди, кои последниве години шират страв и несигурност во северозападна Нигерија. Илјадници луѓе се киднапирани, стотици убиени, а патувањето и земјоделските активности во некои региони станаа небезбедни.

Напаѓачите го нападнале селото Каиру околу 10:40 часот. Локалниот пратеник Хамису Фару го потврди нападот, велејќи дека „киднапирани се најмалку 100 лица, меѓу кои жени и деца“.

Напаѓачите ја држеле заедницата под опсада речиси два часа пред да ги одведат жртвите.

Илјадници жители веќе ја напуштиле областа.