На улиците на главниот град на Куба веќе може да се видат велосипеди од бамбус. Ова евтино и еколошко превозно средство истовремено ги решава проблемите во сообраќајот, но има и потенцијал да ѝ помогне на економијата на оваа карипска земја, пишува „Ројтерс“.

Меѓу класичните автомобили, мопеди и рикши (лесни двоколки) што Кубанците и нивните туристи ги користат за да се движат низ главниот град Хавана, на улиците се појави нов тип возила – бамбус-велосипеди, кои ги произведува локална работилница.

„Вело Куба“, продавница за велосипеди и туристичка компанија, произведува лесни, еколошки опции за транспорт како дел од програмата финансирана од холандската амбасада во оваа карипска земја.

Посетителите на градската Зоолошка градина веќе ги користат овие возила на две тркала.

„Во Куба има 28 видови бамбус. За среќа, тука имаме два или три типа потребни за производство на овие велосипеди“, објаснува основачот на компанијата „Вело Куба“, Нејвис Дијаз.

Во работилницата се ангажирани волонтери, меѓу кои има и невработени мајки, а во работата им се придружи и Здружението на лица со оштетен слух, со цел да се обучат што поголем број жители како да градат и поправаат велосипеди.

„За нас е важно да ја научиме професијата. Ова ќе ни користи во иднина“, рече Жаклин Гонзалес, која е членка на Здружението за оштетен слух.

Некои од учесниците на курсот во иднина би можеле да се вработат во продавница за велосипеди, објаснува Дијаз, или би можеле да отворат свои мали бизниси.

Сообраќајот и вработувањето со полно работно време се хронични проблеми во Куба, каде економијата е тешко погодена од пандемијата на коронавирусот.