Американскиот претседател Џо Бајден и лидерите на Франција, Германија, Италија и Обединетото Кралство во заедничка изјава го повикаа Иран да ја повлече својата закана за напад на Израел, објави Белата куќа.

Во време на растечките тензии на Блискиот Исток, тие разговараа за сериозните последици, од можниот напад, за регионалната безбедност, се вели во соопштението од Белата куќа.

„Го повикавме Иран да ги повлече своите закани за воен напад врз Израел и разговаравме за сериозните последици за регионалната безбедност доколку се случи таков напад“, рекоа лидерите по заедничкиот телефонски разговор, изразувајќи поддршка за одбраната на Израел против Иран и неговиот сојузници.

Во исто време тие повикаа на испорака и дистрибуција на помош за Газа, пренесува „Н1“.

Лидерите на сите пет земји рекоа дека го поддржуваат повикот на Соединетите Американски Држави, Катар и Египет за продолжување на преговорите за прекин на огнот во Газа оваа недела, со цел да се склучи договор што е можно поскоро.

Тие потенцираа дека „нема повеќе време за губење“.

Американскиот советник за национална безбедност Џон Кирби претходно оцени дека Иран оваа недела би можел да изврши серија големи напади врз Израел. Тој призна дека во случај на напад, „тоа дефинитивно може да влијае на преговорите“ за прекин на огнот во Појасот Газа, по што би следело ослободување на израелските заложници. Преговорите се закажани за четврток.

Додека Иран се заканува со одмазда за атентатите на политичкиот водач на палестинското исламистичко движење Хамас, Исмаил Ханије во Техеран и командантот на либанското шиитско движење Хезболах, Фуад Шукра во Бејрут, САД го зголемуваат своето воено присуство на Блискиот Исток за да помогнат во одбраната на Израел против можен напад на Иран и неговите сојузници.

Техеран и Тел Авив одбројуваат часови до голем ирански напад врз Израел