Бахара Рустам (13) била присутна на својот последен час во училиштето Биби Разија во Кабул на 11 декември, знаејќи дека тоа е крајот на нејзиното образование. Под власта на талибанците, таа веројатно нема повторно да стапне во училница.

Во септември 2021 година, еден месец откако трупите на САД и НАТО се повлекоа од Авганистан по две децении војна, талибанците објавија дека на девојчињата им е забрането да учат откако ќе завршат шесто одделение, пренесува АП.

Тие ја проширија оваа забрана за образование на универзитетите во декември 2022 година. Талибанците се спротивставија на глобалната осуда и предупредувањата дека ограничувањата ќе им оневозможат да добијат признание како легитимни владетели на земјата.

Минатата недела, специјалниот претставник на ОН, Роза Отунбаева изрази загриженост дека една генерација авганистански девојки заостанува со секој изминат ден.

Oфицијален претставник на Министерството за образование рече дека на авганистанските девојчиња од сите возрасти им е дозволено да учат во верски училишта познати како медреси, кои традиционално биле само за момчиња. Но Отунбаева рече дека не е јасно дали постои стандардизирана наставна програма која дозволува модерни предмети.

„Да завршиме шесто одделение значи дека треба да одиме во седмо“, рече таа. „Но, сите наши соученици сега плачат и ние сме многу разочарани“.

Во училиштето Биби Разија немаше никаква церемонија за девојчињата.

Во друг дел на Кабул, 13-годишната Сетајеш Сахибзада се прашува што носи иднината за неа. Таа е тажна што не може повеќе да оди на училиште за да ги оствари своите соништа.

„Не можам да застанам на свои нозе“, рече таа. „Сакав да бидам учителка. Но, сега не можам да учам, не можам да одам на училиште“.

Аналитичарот Мухамед Салим Паигир предупреди дека исклучувањето на жените и девојчињата од образованието ќе биде катастрофално за Авганистан. „Ние разбираме дека неписмените луѓе никогаш не можат да бидат слободни и просперитетни“, рече тој.

Талибанците им забранија на жените присуство на многу јавни места, како и забрана за работа освен во нивните домови.