Најсветлиот познат објект во универзумот, квазар 500 тони пати посветол од нашето Сонце, „се криел пред нашите очи“, велат истражувачите.

Австралиските научници забележале квазар напојуван од најбрзо растечката црна дупка досега откриена. Неговата маса е околу 17 милијарди пати поголема од онаа на сонцето на нашиот Сончев систем и дневно „јаде едно Сонце“, пренесува Гардијан.

Светлината од небесниот објект патувала повеќе од 12 милијарди години за да стигне до Земјата.

Научниците од Австралискиот национален универзитет првпат го забележаа со помош на телескоп од 2,3 метри во опсерваторијата на универзитетот Сајдинг Спринг во Нов Јужен Велс во Кунабарабран. Тие потоа го потврдија откритието користејќи го огромниот телескоп на Европската јужна опсерваторија (ЕСО), кој има основно огледало од 8 метри.

Наодите на истражувачите на АНУ, во соработка со ЕСО, Универзитетот во Мелбурн и францускиот Универзитет Сорбона се објавени во Нејчр Астрономи.

Главниот автор и вонреден професор на АНУ, Кристијан Волф, рече дека тоа е најсветлиот познат објект во универзумот и дека неговата неверојатна стапка на раст значи „огромно ослободување на светлина и топлина“ – и дека се сомнева дали неговиот рекорд некогаш ќе биде претепан.

Светлината се емитува од „акрециски диск“ со дијаметар од седум светлосни години. Тој диск е местото каде што материјалот се влече и се врти околу црната дупка, пред да го премине хоризонтот на настани. Како што тој материјал се удира во друг материјал, создава огромни количества светлина и топлина.

„Изгледа како огромна и магнетна бура со температури од 10.000 Целзиусови степени, молњи насекаде и ветрови кои дуваат толку брзо што би ја обиколиле Земјата за секунда. Оваа бура е со ширина од седум светлосни години, што е 50% повеќе од растојанието од нашиот Сончев систем до следната ѕвезда во галаксијата, Алфа Кентаури“, рече Волф.

Коавторот, д-р Кристофер Онкен рече дека е изненадувачки што останало неоткриено толку долго и дека „се криело пред нашите очи“.