Првиот вицепремиер и министер за политички систем Артан Груби на денешното отворање на новиот Центар за трансплантација на матични клетки на Клиниката за хематологија рече дека после 8 мај, апсолутен приоритет на новата влада треба да биде изградбата на нов Клинички центар. Овој проект сите министри  и премиери го ветуваат, ама никој не го реализираше, иако е дел од предизборниот фолклор уште од времето кога премиер беше Никола Груевски. Груби денеска ги спомена и стратешките одлуки, кои, според него, граѓаните ќе треба да ги направат на изборите. Фактот што американската влада донираше 1 милион долари за да се отвори Центарот за трансплантација на матични клетки во Скопје, беше мотив Груби да почне да зборува за разликите меѓу Русија и Америка.

– Апсолутен приоритет на новата влада после 8 мај треба да биде новиот Клинички центар. Да го изградиме заедно, зашто е потреба на сите наши граѓани.  Овој проект е потврда дека сѐ што добиваме од Русија се проблеми, провокации и обиди за застранување од европскиот пат. А сѐ што добиваме од владата на Америка е поддршка за нашите европски аспирации, реновирање болници, градење на патишта и градинки. Граѓаните треба да видат што добиваме од нашето партнерство со ЕУ и САД, а што добиваме од деструктивното малигно влијание на Русија. Многу е важно да направиме одлука дали ни треба европска или проруска Македонија, рече Груби.

Англиска и турска компанија заинтересирани за изградба на новиот клинички центар, вели Меџити