Англискиот фудбалски клуб Арсенал покажува сериозен интерес за Џошуа Кимих од Баерн Минхен, пренесува Скај Германија.

На играчот од средниот ред му истекува договорот и може да преговара со други клубови, но во исто време води разговори и со Баварците.

Доколку биде доведен Кимих, Арсенал ќе пополни сериозна дупка во средниот ред, бидејќи Жоргињо и Томас Парти исто така се на истек на договори. Медиумите во Англија тврдат дека „топчиите“ не се далеку од трансфер на играчот од средниот ред на Реал Сосиедад, Мартин Субименди.

Скај Спортс во своите информации додава дека лондончани исто така имаат можност да се свртат кон својата академија за длабочина во составот.

Арсенал е втор во Премиер лигата, со 13 бода помалку од лидерот Ливерпул и шест пред третопласираниот Нотингем форест. Шансите на „топчиите“ да ја освојат титулата не се големи, но речиси сигурно ќе бидат во Лигата на шампионите и следната година.