Една недела откако Русија ја започна инвазијата на Украина, семејството на 15-годишната Арина Јациук решиле да го напуштат својот дом во близина на Киев со автомобил, пишува „Си-Ен-Ен“. По петнаесет километри ги застанале група руски војници.

Војниците почнале да пукаат, а потоа од задното седиште ги повлекле Арина и нејзината 9-годишна сестра Валерија. Арина била ранета и ставена во еден автомобил, а Валерија во друг. Валерија била однесена во блиското село, каде мештаните ја нашле како стоела покрај патот. Родителите на девојчињата, Денис и Ана биле пронајдени мртви во нивниот автомобил.

A week after Russia invaded, the family of 15-year-old Arina Yatsiuk decided to flee their home near the Ukrainian capital by car. Less than 10 miles down the road, they encountered a group of Russian troops.https://t.co/bemNvbQzeI

— CNN International (@cnni) March 6, 2023

На 3 март 2022 година, некој последен пат ја видел Арина. Таа е едно од 345-те украински деца кои исчезнале откако Русија ја започна својата инвазија врз Украина минатиот февруари, според официјалната украинска статистика.

Украинската влада соопшти дека многу од исчезнатите деца биле насилно однесени во Русија. Руската влада не негира дека ги зема украински деца – всушност вели дека ги „спасува“.

Тетката на Арина, Оксана Јациук, изјави за „Си-Ен-Ен“ дека семејството трага по девојчето со кафени очи откако исчезнало. Арина добро цртала, сакала да се шминка и обожавала да патува, вели нејзината тетка.

„Имаше големи соништа, но „руските ослободители“ решија сѐ за неа. Кога ќе ја најдеме, ќе продолжиме со нејзините планови“, рекла тетката.

Семејството верува дека девојката, која сега има 16 години, сè уште е жива и „заробена“ во Русија.

„Испратив официјални писма до сите медицински установи, Министерството за здравство во Русија, Белорусија и Украина. Тие ми одговорија дека никаде не е регистрирано девојчето“, изјави Оксана во телефонскиот разговор за Си-Ен-Ен.

„Таа не е ниту на официјалните списоци на смртни случаи“, рече таа.

Руски волонтер кој помагал во потрагата верува дека Арина била однесена во медицинска установа во Русија и оттогаш останала во земјата. Тој рече дека нема нови траги за случајот од есента.

Марина Липоветска, раководител на проектот Магнолија, украинско здружение кое се занимава со исчезнати деца, вели дека девојчето е сведок на воено злосторство.

„Ако нејзината помлада сестра не разбрала дека нивните родители се убиени, претпоставувам дека Арина сфатила. Таа и самата е ранета и е жртва на воено злосторство“, рече Липоветска.

ОН го истражува наводното испраќање на украински деца во Русија каде што се дадени на посвојување од руски семејства.

Во текот на изминатата година, бројни руски функционери јавно се пофалија дека донеле украински деца во земјата. Според нивните изјави, илјадници деца од окупираните територии биле депортирани во оддалечените делови на Русија каде многу од нив биле брзо посвоени од локалните семејства и добиле руско државјанство.