Антонио Конте е без клуб од минатата година кога се раздели со Тотенхем. Пред тоа ги водеше Челси, Јувентус, Интер, Сиена, Аталанта, Бари и Арецо, а селектор на Италија беше од 2014 до 2016 година.

Италијанскиот фудбалски тренер Конте денеска демантираше дека ќе ја преземе функцијата тренер на Наполи на македонскиот репрезентативец Елиф Елмас, во случај италијанскиот шампион да го заменат Руди Гарсија поради серијата лоши резултати.

– Слушам упорни гласини за трансфери кои ме поврзуваат со разни клубови, но повторувам, единствена желба ми е да се одморам и да уживам со семејството – напиша Конте на Инстаграм.

Претходните денови медиумите пишуваа дека Французинот Гарсија ќе биде сменет како тренер на Наполи, но тоа не се случи.

Наполи претрпе два порази на домашен терен, од Реал во Лигата на шампионите и Фиорентина во Серија А. По осум одиграни кола, шампионот на Италија има седум бода помалку од лидерот Милан.