После 21 објавен албум, одржани 100 семинари за музика и настапи во 42 земји низ светот, изведувачот на народни инструменти Стефче Стојковски ќе го прослави 25-годишниот јубилеј на неговиот ансамбл.

На концертот насловен „За Македонија и Македонците“ заедно со Стефче Стојковски ќе настапат врвни вокалисти и изведувачи на македонски традиционални инструменти.

– Традиционалната музика е составен дел од македонскиот непокор. Уште од памтивек, низ изворните мелодии луѓето ги ваделе од себе маките и ги споделувале радостите. Македонските народни песни во себе ги чуваат преданијата за јунаците на нашата земја, за големите случувања, за мудростите на животот и многу друго. Просто кажано, музиката го пои духот на човекот, а преку поединци и друштва, нејзиниот добробит може да се пренесе и на целиот народ – истакнува Стефче Стојковски за музиката што ја изведува на своите концерти.

Славеничкиот концерт ќе се одржи на 21 листопад (октомври), со почеток од 19:50 часот, во големата сала на Македонска филхармонија.