Андреј Маслинко е повторно дел од македонската кошаркарска сениорска репрезентација. И извесно е, важи за еден од оние играчи кои треба да ги покриваат оние „внатрешни позиции“ во ростерот на националната селекција која ова лето е дел од олимписките претквалификации кои стартуваат на 12 август со турнирот во Талин, а кои продолжуваат во полскиот град Гљивице.

– Подготовките само што започнаа. Се подготвуваме, макар што сè уште не сме комплетни, односно, допрва треба да се комплетираме. И искрено се надевам дека ќе имаме доволно време до пријателските натпревари да се подготвиме, и да дадеме некој свој максимум – вели Маслинко.

Дали оние две проверки против Полска, на „неутрален терен“ во Белград, ќе бидат доволни за да бидеме максимално подготвени за она што нè чека во Талин?

– Краток е периодот на подготовки. И нема доволно време за натпревари. Од таа гледна точка, натпреварите се добредојдени. Доколку има уште некој меч, тоа би било голем плус. Меѓутоа, тоа е што е, мораме да се подготвиме најдобро што можеме – рече Маслинко.

Љубомир Младеновски по пауза од една година повторно е дел од репрезентацијата

Реално, колку победи може да се очекуваат на турнирот во Естонија. И дали можеме да направиме нешто повеќе, односно да имаме прогресија во следната фаза од претквалификациите за Олимпијадата во Париз?

– Да бидам искрен, не ги познаваме, сè уште, доволно ростерите на противниците. Јас се надевам на успешни игри. Ќе одиме максимално, до крај. Ќе одиме на победа на секој натпревар. И се надевам дека можеме да се надигруваме со сите селекции кои ќе бидат таму во Талин – дополнува крилото на нашиот сенироски национален тим по приклучувањето на подготовките кои во наредниот период продолжуваат во салата на СРЦ „Кале“.