На редовната седница на Одборот на директори на АД ФК Вардар одржана на 7 август 2025 година, едногласно беше прифатен предлогот на неизвршниот директор Мартин Гелев, легенда на Македонскиот фудбал и на Вардар, Андон Дончевски да биде прогласен за почесен претседател на клубот.

Поголемиот дел од својата играчка и тренерска кариера Дончевски го помина во фудбалскиот клуб Вардар.

Дончевски беше и прв селектор на македонската фудбалска А репрезентација.

Денеска почнува новата сезона во Првата македонска лига, а играчите на Вардар предводени од тренерот Гоце Седлоски во првото коло на Националната арена „Тодор Проески“ – Скопје ќе играат против вечниот ривал ФК Пелистер со почеток од 20.00 часот.

– Конечно стартува шампионатот за кој се подготвувавме цело лето. По успешната европска авантура, сега целосно сме фокусирани на домашното првенство. Не може да се посака подобар старт, вечно дерби против Пелистер, под рефлектори, пред нашите навивачи. Вистинско уживање. Сконцентрирани сме, подготвени и максимално мотивирани.

Пелистер е незгоден противник и сигурно ќе дојде во Скопје по позитивен резултат. Но, ние сме Вардар, играме дома, во идеални услови и ќе дадеме сè од себе за трите бода со помош и на нашите верни навивачи – вели хрватскиот дефанзивец на Вардар, Мислав Матиќ.