Агенцијата за национална безбедност (АНБ) веќе доставила три известувања до Јавното обвинителство за еден поранешен директор и група вработени во АНБ организирани во група, поради индиции за незаконско, непрофесионално и неетичко постапување. Известувањата, кои биле испратени до Јавното обвинителство пред околу еден месец, како што велат од АНБ, се резултат на внатрешна истрага спроведена по смената на власта во 2024 година, а се однесуваат на постапувања во периодот од 2019 до 2024 г.

Внатрешната истрага довела до сознанија за оформување предмети за оперативни обработки на опозицијата, лидер на опозициска партија и група новинари и медиуми чија цел, според предметот, била уривање на власта. Притоа се користел целокупниот потенцијал на Агенцијата заради пресметка со опоненти, а утврдена е и злоупотреба на мерката притвор. Цел на друга обработка, меѓу другото, биле јавен обвинител и министер во тогашната влада. Според информациите од АНБ, утврдено е и тенденциозно постапување, поточно намерно одолговлекување на безбедносни проверки, на пример, за еден пратеник на тогашната опозиција, во постапка за добивање безбедносен сертификат.

Внатрешната истрага на АНБ утврдила дека во овие случаи противправно биле користени материјално-техничките ресурси на Агенцијата, а незаконски се спроведувало и следење на комуникациите.

Инаку во периодот за кој се однесува истрагата со Агенцијата раководеа Виктор Димовски и Заре Милошевски.