По најавата дека претседателката на Европската комисија, Урсула фон дер Лајен ја номинираше ексшефицата на бугарската дипломатија Екатерина Захариева за европски комесар за стартапи, истражување и иновации, бугарскиот сервис на паневропската новинска мрежа „Еурактив“ објави текст во кој се отвораат прашањата што може да ја саботираат нејзината кандидатура.

Како што пишува „Еурактив“, Захариева одбила да одговори на прашањата што ѝ биле испратени, а за кои се очекува да бидат ставени на расправа пред Европскиот парламент.

Едно од прашања што можат да ја саботираат кандидатурата на Захариева е „Кои се заслугите на Орце Камчев за да биде предложен за почесен конзул и со тоа да добие имунитет од кривично гонење?“.

Како што пишува медиумот, тој тогаш ги контролираше медиумите кои водеа активна антибугарска кампања во корист на поранешниот лидер на ВМРО-ДПМНЕ, Никола Груевски.

– Во 2020 година, владата на Бојко Борисов ја блокираше европската интеграција на Северна Македонија поради партиските интереси на неговиот партнер од ВМРО, додека Захариева е министер за надворешни работи. Поголем проблем за Захариева е што таа во 2019 година лично го предложи бизнисменот со бугарски пасош Јордан (Орце) Камчев за почесен конзул на Бугарија во Република Северна Македонија – пишува Еурактив.

Тој беше осуден за вмешаност во шема за перење пари поврзана со нелегално купување земјиште, а на црната листа за корупција во САД е од 2023 година.

– Досега темата за Орце Камчев беше занемарена кога се зборуваше за кандидатурата на Екатерина Захариева во европските изданија. На 8 јуни, тогашниот пратеник на БСП, Петар Витанов, кој подоцна стана лидер на групата БСП во Европскиот парламент, постави прашања за причините за назначувањето на Камчев – потсетува медиумот.

Петар Витанов во својство на пратеник е единствениот кој од говорницата на Народното собрание во 2018 година го постави прашањето зошто бугарската влада на Бојко Борисов го предложи Орце Камчев, кого го нарече „македонски бизнисмен со многу контроверзна репутација“, како конзул на Бугарија во Северна Македонија.

Тогаш Захариева одговори дека „ќе работи на подобрување на основните економски, културни и други врски меѓу двете земји“.

Запрашан како се чувствува за „Захариева и Орце Камчев“, бидејќи Камчев е на Црната листа на САД, а Захариева е кандидат за комесар, тој рече:

„Во погрешната политика на ГЕРБ кон Северна Македонија, која е основата на проблемите што ги имаме со оваа земја сега, Захариева е само елемент, инструмент на оваа политика. На сите им е јасно дека не Захариева, туку Бојко Борисов сакаше да го направи Орце Камчев конзул на Бугарија“.

Просперитетот, безбедноста и демократијата главни приоритети на новиот состав на ЕК