По години елегантно избегнување на прашања, Ана Винтур за првпат отворено проговори за споредбите со Мерил Стрип и нејзината Миранда Пристли од култниот филм „Ѓаволот носи Прада“.

Филмот „Ѓаволот носи Прада“ од 2006 година, базиран на истоимениот роман од Лорен Вајсбергер, со години се смета за фикционализирана приказна инспирирана од работата на Ана Винтур на чело на американскиот „Вог“ . Заплетот се фокусира на амбициозната новинарка Енди Сакс (Ен Хатавеј) која добива работа како асистент на уредничката Миранда Пристли (Мерил Стрип). Иако Винтур со години избегнуваше директни коментари, во интервју за „Њујоркер радио час“ таа конечно проговори и изненади.

„Дојдов на премиерата, целосно несвесна за што се работи во филмот“, изјави Винтур за уредникот на „Њујоркер“, Дејвид Ремник, откривајќи дека модната индустрија била „многу загрижена“ дали филмот ќе ја прикаже во лошо светло. Кога Ремник додаде дека стравот веројатно е поврзан со „карикатура“, Винтур без двоумење потврди: „Да, карикатура“.

Сепак, нејзината реакција откако го изгледала била спротивна од она што го очекувала. „Прво на сите, тоа е Мерил Стрип – фантастично“, рекла таа, додавајќи дека одлично се забавувала во кино: „Навистина ми се допадна филмот. Многу смешен.“ Таа, исто така, се присети на разговор со Миуча Прада : „Често зборуваме за тоа и јас ѝ велам: „Па, тоа беше навистина добро за тебе.“ На крајот, заклучи таа, „беше добар хит“, и во однос на тонот на филмот и во неговиот приказ на светот на списанијата, кои се многу посложени во реалноста отколку на екранот.

„Ѓаволот носи Прада“ беше и комерцијален триумф: со проценет буџет од 40 милиони долари, заработи 326 милиони долари глобално и стана една од најцитираните модни комедии од 2000-тите. Речиси две децении подоцна, во тек е снимање на продолжение, во кое повторно глумат Мерил Стрип, Ен Хатавеј, Емили Блант и Стенли Тучи, а премиерата е најавена за мај 2026 година.

Низ годините, Винтур најчесто одговарала на прашањата за нејзините сличности со Миранда со доза на дистанца. Минатата година, на гала изведба на музичката адаптација на „Ѓаволот“, таа за Би-Би-Си изјави дека „на публиката и луѓето со кои работи“ е да проценат дали има сличности меѓу неа и Миранда Пристли.