Американците годинава на „Црн петок“ потрошиле околу 11 милијарди долари за онлајн шопинг, што е за 10,2 отсто повеќе од минатата година, покажуваат податоците на Адоб Аналитикс.

Компанијата вели дека Американците најмногу потрошиле пари на шминка, производи за нега на кожа и коса, како и блутут звучници и машини за еспресо.

Продажбата на играчки преку Интернет е зголемена за 622 отсто во однос на просечната дневна продажба во октомври, додека продажбата на накит е зголемена за 561 отсто, а на апарати за домаќинство за 476 отсто во однос на октомври, се наведува во соопштението за печатот, пренесе телевизијата Еј-Би-Си.

Американските купувачи потрошиле 9,8 милијарди долари на онлајн шопинг за „Црн петок“ во 2023 година, што е повеќе од 9,1 милијарди долари една година порано.

Црниот петок, ден по американскиот празник Денот на благодарноста, го означува официјалниот почеток на празничната шопинг сезона за трговците на мало кога нудат големи попусти.