Американските власти сметаат дека двојната олимписка шампионка, кошаркарката Бритни Грајнер е „бесправно притворена“ во Русија, навестувајќи дека ќе ги зголемат напорите таа да биде ослободена.

Грајнер беше уапсена во февруари на аеродромот во Москва, откако руските царински службеници кај неа нашле ампули со масло од хашиш. Таа не е формално обвинета од властите, но нејзиното сослушување е закажано за 19 мај. Од нејзиното апсење, тензијата помеѓу Русија и САД е зголемена поради војната во Украина, што го комплицитра и овој случај.

Според Министерството за надворешни работи на САД, Русија бесправно ја држи во притвор Грајнер. Специјалниот пратеник Роџер Карстенс го води тимот кој работи за таа да биде ослободена. Грајнер е кошаркарка на ВНБА лигашот Феникс меркјури, а настапува и за тимот на УММЦ Екатеринбург од Русија, кога не игра во американската лига.

Грајнер игра на позицијата центар, а има олимписки медали од ЛОИ Рио 2016 и Токио 2020. Со рускиот тим таа ја има освоено Евролигата четири пати, а шампионка е и во ВНБА лигата.

Маслото од хашиш е делумно легално во некои држави од САД, но е нелегално во цела Русија. Многу е чудно што Грајнер, која во Русија настапува седум години, не знаела дека со тоа што има вакво масло го крши законот на земјата во која престојува, велат Русите. Таа е уапсена поради шверц на значително количество наркотици, што може да и донесе 10 години затвор, ако биде прогласена за виновна.