Американците стануваат пооптимистични кога станува збор за економијата – покажува најновата анкета на Универзитетот во Мичиген, пренесува Си-Ен-Би-Си. Според нив, расположението на потрошувачите – односно колку луѓето се чувствуваат сигурни и подготвени да трошат пари – е на највисоко ниво во последните пет месеци.

Според првичните бројки, индексот кој го мери расположението се искачил од 60,7 поени во јуни на 61,8 во јули.

Истовремено, граѓаните очекуваат инфлацијата – односно порастот на цените – да биде помала. Очекуваната годишна стапка на инфлација паднала од 5% во јуни на 4,4% сега во јули. И долгорочните очекувања за инфлацијата се намалиле – од 4% на 3,6% – што е најниско ниво во последните пет месеци.

И бројките од малопродажбата ги изненадија економистите: Американците во јуни трошеле повеќе од очекуваното – продажбата се зголемила за 0,6% на месечно ниво. Експертите очекуваа многу послаб раст – само 0,2%. Иако инфлацијата сè уште постои, Американците не се откажуваат од трошењето, а тоа е добар знак дека економијата сè уште се движи напред.