Вардар за првпат загуби на домашен терен од екипата на Пик Сегед во Лигата на шампионите. Во еден борбен и квалитетен натпревар, на крајот противникот од Унгарија ги освои бодовите триумфирајќи со 26:28.

Со оглед на тоа што веќе и двата тима се во осминафиналето, овој меч беше важен да се добие за што подобра позиција на табелата и што „полесен“ ривал во елиминациските борби.

Тренерот на Вардар 1961, Стевче Алушовски:

– Честитки до тимот на Сегед за двата важни бода, кои беа важни и за нас. Да им честитам на моите играчи кои дадоа  сè од себе, го одигравме можеби во оваа сезона еден од најдобрите натпревари за нас. Јас сум малку тажен затоа што загубивме, но сум среќен бидејќи навистина одиме во добра насока со тимот. Се трудиме да бидеме често фокусирани и спремни на сите предизвици. Сегед е една извонредна екипа која што секоја година се бори за Фајнал-фор.

Среќен сум поради перформансите такви какви што ги имавме, промашивме во клучните моменти, доколку не се лажам три пенали, една или две контри, така што овој меч можеше да заврши во наша корист, но што е тука е, уште еднаш честитки до Пик Сегед и му посакувам многу среќа во наредните натпревари.

Ракометарот на Вардар 1961, Гоце Георгиевски:

– Честитки до Пик Сегед, беше многу тежок натпревар, ние одигравме добро особено во првото полувреме, како во одбраната, така и во нападот. Во вториот дел гостите одиграа подобро во однос на првите 30 минути. Во последните 10 минути не реализиравме неколку удари, загубивме концентрација и противниците победија на крајот.

Но, ова е спорт, сега се подготвуваме за мечот в четврток во обид да бидеме подобри и со надеж среќата да биде на наша страна.

ФОТО: Вардар се бореше, но на крајот Пик Сегед ги освои бодовите!