Вардар 1961 го претрпе и шестиот пораз сезонава во осмиот натпревар од групната фаза во Лигата на шампионите..

„Црвено-црните“ по вторпат за четири дена е совладан од унгарскиот Пик Сегед, денеска на теренот на противникот со 34:33.

Стратегот на двократниот европски шампион, Стевче Алушовски не е среќен од прикажаната игра на своите играчи и истакна дека воведните 15 минути од второто полувреме биле пресудни за поразот.

– Честитки до Пик Сегед кој беше подобар двапати во краток период. Добро стартувавме, многу добро напаѓавме, но потоа во второто полувреме имавме лоши 15 минути. Не реализиравме зицери во важни моменти, а воедно немавме и идеја при „7 на 6“ – вели Алушовски.

Ловро Јотиќ, ракометарот на Вардар 1961:

– Честитки до Пик Сегед кој дојде до две победи против нас. Одигравме два тесни натпревари, заслуживме да освоиме барем еден бод. Бевме добри во првото полувреме, но во второто имавме лоши периоди, направивме грешки. Се надевам дека ќе освојуваме бодови во наредните мечеви.