Карлос Алкараз се избори за свое прво финале на Мастерсот во Рим, откако во полуфиналето по голема борба го победи домашниот фаворит Лоренцо Мусети со 2:0 во сетови (6:3, 7:6).

Со оваа победа, 21-годишниот Шпанец стигна до своето 25-то финале во кариерата и седмо на турнирите од серијата Мастерс 1000.

Дуелот помеѓу Алкарас и Мусети траеше два часа и четири минути, исполнет со многу борба, но и со доста осцилации во играта на Шпанецот. Иако направи голем број неизнудени грешки, Алкараз успеа да се извлече и да ја искористи втората меч-топка за пласман во финалето.

Натпреварот започна одлично за Алкараз и веднаш направи брејк со што поведе 4-1. Мусети успеа да врати еден брејк и да намали на 4-3, но младиот Шпанец потоа освои два последователни гема и го освои првиот сет со 6-3.

Вториот сет беше далеку понеизвесен и на почетокот следуваа три гема со три брејка, а иницијативата ја презеде Мусети кој поведе со 4-2. Сепак, Алкараз брзо се врати, доби три гема по ред и поведе со 5-4. Италијанецот не се предаде и успеа да израмни на 5-5, па дури и да спаси една меч-топка во 12. гем, по што сетот влезе во тај-брејк.

Во одлучувачкиот дел од сетот, повеќе самоконтрола покажа Шпанецот, кој го доби тај-брејкот со 7-4 и со тоа обезбеди место во финалето, каде ќе се соочи со победникот од полуфиналниот дуел помеѓу Јаник Синер и Томи Пол.